Haradinaj: Do të punoj për të gjithë qytetarët, pa dallim

5:26 pm 10.09.17

 

Kryeministri i sapozgjedhur i Kosovës, Ramush Haradinaj, ka falënderuar ata që e votuan “por edhe ata që votuan kundër” duke thënë se “ky është thelbi i demokracisë”.

Në një postim të tij në Facebook, Haradinaj ka thënë se do të punoj “me krejt qenien time” për të gjithë qytetarët e Kosovës, pa dallim.

 

Ky është postimi i tij i plotë:

 

Të dashur qytetarë të Republikës së Kosovës,

Dje mora besimin për të udhëhequr Qeverinë e vendit në mandatin katërvjeçar.

I falëndëroj të gjithë ata që më besuan, por edhe ata që votuan kundër, sepse ky është thelbi i demokracisë.

Zotohem para jush qytetarë të dashur, se do të jem në shërbimin tuaj e të shtetit, dhe do të punoj me krejt qenien time për mirëqenien e përgjithshme të shoqërisë kosovare.

Qeveria që do ta drejtoj, do të jetë qeveri e të gjithë qytetarëve të Kosovës, pa dallim etnie, besimi, përkatësie politike apo ideologjie, dhe do të jetë më e gatshme se asnjëherë më parë që të bashkëpunojë ngusht më opozitën parlamentare, shoqërinë civile dhe median.

Menjëherë pas marrjes së besimit për ta udhëhequr Qeverinë e vendit, kam pranuar mijëra urime nga qytetarë, simpatizantë të AAK-së e të partive të tjera, nga diplomatë e përfaqësues shtetesh, nga të cilët ndër të parët ishin, Kryeministri Edi Rama, Presidenti Ilir Meta, dhe Senatori Eliot Engel!

Një falënderim i përzemërt për të gjithë ata!

Nisja e re për Kosovën bëhet, vetëm duke qenë të bashkuar, e me besim në njëri tjetrin!

 

 

URBAN Electro

URBAN Funk

URBAN FM